Euskadik eta Suediak beren gizarte-berrikuntzako ekosistemak konektatu dituzte
Agirre Lehendakaria Centerek Anna Tengqvisten bisita koordinatu du apirilaren 23an eta 24an, Euskadiko eta Suediako gizarte-berrikuntzako ekosistemen arteko loturak sendotzeko diseinatutako truke baten baitan.
Malmöko Unibertsitateko Gizarte Berrikuntzarako Foroaren eta Gizarte Berrikuntzarako Suediako Gaitasun Zentroaren koordinatzaile gisa, Tengqvistek unibertsitateak, erakunde publikoak eta gizarte zibila biltzen dituen plataforma nazional bat zuzentzen du. Haren bisitari esker, ezagutza-trukaketa sakona egin ahal izan da gobernantza kolaboratiboari eta eraldaketa sozialerako estrategia instituzionalei buruz.
Elkarrekin ikasteko eta esperientziak trukatzeko bi jardunaldi
Lehen jardunaldiak herri-politiken eta unibertsitatearen arteko lotura izan zuen ardatz. Gasteizen, Anna Tengqvist Asier Aranbarrirekin (Eusko Jaurlaritza) bildu zen, erakundeek gizarte-berrikuntza nola babesten duten aztertzeko. Ondoren, Eusko Legebiltzarrean, Xabier Barandiaranekin hitz egin zuen berrikuntza demokratikoaz eta Malmöko Unibertsitatearekin batera egin litezkeen ikerketez. Eguna amaitzeko, EHUren gizarte-inpaktuko estrategia aztertu zuen Ugo Mayorrekin, eta lan-saio bat egin zuen ALC taldearekin, egungo metodologiak eta proiektuak jorratzeko.
Bigarren jardunaldiak Gipuzkoako lurralde-estrategian eta herritarren ekimenetan jarri zuen fokua. Aldundiko Estrategia taldeak, Iosu Arraiz eta Olatz Errazkinekin, gobernantza-ereduak eta tokiko ekosistemak partekatu zituen. Ibilbideak Kutxa Fundazioan jarraitu zuen, aliantza ekosozialak esploratzeko, eta HUHEZIn (Mondragon Unibertsitatea) amaitu zen, hezkuntzaz eta ezagutzaren transferentziaz hitz egiteko.