Kalitate demokratikoa hobetzeko tresna digital berriak
Martxoaren 11n, Euskadin kalitate demokratikoa hobetzeko Legebiltzarreko batzordearen esparruan, Gorka Espiau Idoiaga Agirre Lehendakaria Centerreko (ALC) zuzendariak agerraldia egin du Eusko Legebiltzarrean, erakundeak gobernantza kolaboratiboaren arloan garatzen dituen gakoak eta metodologiak partekatzeko. Ponentzia honen helburu nagusia tresna eta jarduera-esparru berriak zehaztea da, euskal erakundeak eta herritarrekiko lotura indartzeko.
ALCren txostenak tradizionalki urrun egon diren munduak konektatzeko beharra izan zuen ardatz, hala nola tresna digital berriak eta sakontze demokratikoko prozesuak. Praktikan, azpiegitura zientifiko eta teknologiko berriak eraikitzen ari gara gure gizarteak dituen erronka konplexuenei aurre egiteko, baina ez dira garatzen ari kalitate demokratikoa hobetzeko tresna gisa. Azpiegitura berri horiek ezagutzaren arloan ditugun lehentasunetan sakontzeko eta irtenbide teknologiko berriak eskaintzeko balioko dute, baina, era berean, gizarte-problematikak hobeto ulertzeko eta zorroztasun zientifiko handiagoz jorratzeko aukera emango digute. Praktikan, euskal erakundeentzat lehentasunezkoak diren erronka sozial konplexuak (bizitza-luzetasuna, etxebizitza, desberdintasunak...) azpiegitura zientifiko eta teknologiko berriekin lotzea dakar. Gizarte Zientzia Konputazionalen eremu berria da, maila globalean oso azkar garatzen ari dena eta Euskadin oraindik espreski artikulatu ez dena.
Gaitasun horiek konektatzea lortzen bada, datu sozialen katalogo berriak sortu ahal izango ditugu euskal gizartearen erronka nagusiei buruz, ebidentzia zientifikoak eta pertzepzio sozialak konbinatu ahal izango ditugu, eta simulazioak egin ahal izango ditugu adimen artifizialeko ereduetan oinarrituta (biki digital sozialak), euskal erakundeek ebidentzian oinarritutako erabakiak har ditzaten. Zientzia, teknologia eta sakontze demokratikoaren konbinazio horrek euskal gizarteak gobernantza kolaboratiborako behar dituen azpiegitura berriak eraikitzeko aukera eman diezaguke. Ez bakarrik berrikuntzako ranking nagusietako postuak berreskuratzeko, baita nazioartean kalitate demokratikoaren erreferentzia bihurtzeko ere. Gure herrialdearen tamainak, kapital sozialak, azken hamarkadetan zientziaren eta teknologiaren arloan eraikitako oinarriek eta autogobernuak zientzia, teknologia eta sakontze demokratikoa integratuko dituen living lab handi gisa kokatzeko aukera ematen digute.