Gizarte-berrikuntza San Kristobal Eskola Merkatuan
Martxoaren 6an, ostiralean, ISOT – Gizarte Berrikuntza Ohiko Ofizioetan proiektuaren saio berri bat egin zen San Kristobal Eskola Merkatuan. Lan kolektiborako gune honek prestakuntza sendotzea eta funtsezko ofizioetan lana lortzeko bidea erraztea du helburu.
ISOT proiektua hainbat eragileren arteko konpromiso partekatutik jaio da, laneratzeko aukera errealak sortzen jarraitzeko, batez ere ostalaritzaren eta errestaurazioaren esparruetan. Prozesu honen bidez, Agirre Lehendakaria Centerrek ikaskuntza kolektiboko dinamika batean laguntzen du, sektorearen erronkak hobeto ulertzeko eta gizarteratzeko estrategiak hobetzeko helburuarekin.
Azken hilabeteotan, mapaketa eta entzute aktiboko lehen fase bat garatu da funtsezko eragileekin —administrazio publikoak, ikasleak, prestatzaileak, sektoreko enpresak eta gizarte-erakundeak—. Horri esker, gizarte- eta lan-txertaketarako programaren funtzionamenduari buruzko eta sektoreak zein prestakuntza-prozesuan dauden pertsonek dituzten erronkei buruzko begirada sakonagoa eraiki ahal izan da. Bildutako narrazioek inplikatutako eragileek prozesua nola bizi eta ulertzen duten islatzen dute. Horien artean, San Kristobal Eskola Merkatuak sektorearen errealitatearekin lotutako prestakuntza-gune gisa duen balioa nabarmendu zen; izan ere, merkatuaren beraren jarduerari esker, ikasleak benetako enplegurako presta daitezke. Era berean, hurbileko laguntza pertsonalizatuaren garrantzia azpimarratu zen, hori baita gizarte- eta lan-txertaketarako prozesuetan gehien laguntzen duen faktoreetako bat. Narrazioek hainbat erronka ere jarri zituzten mahai gainean, hala nola ostalaritzan eta merkatuko ofizioetan prestatutako profesional gehiago izateko beharra, edota gizarte-laguntzak dakarren ahalegina, askotan ikusezina izan arren, funtsezkoa baita egoera konplexuak bizi dituzten pertsonei laguntzeko.
Saioaren ardatza lehen emaitzen interpretazio kolektiboa izan zen. Bertan, CESALeko ikasle eta prestatzaileek, enpresek (Jamonalia) eta jatetxe laguntzaileek (VAIT), eta gizarte-erakundeek (La Merced, La Cantueña Lehen Arretako Zentroa, CAED Carabanchel, El Lavadero) bildutako informazioa aztertu, esperientziak partekatu eta hobekuntza-proposamenak landu zituzten, ikuspegi horizontal eta kolaboratibo batetik. Granadako Unibertsitateak ere parte hartu zuen, eta datu horiek erabiliko ditu biztanleria ahularentzako prestakuntzari eta ohiko ofizioei buruzko gida metodologiko bat egiteko, ebaluazio ebolutioko prozesuarekin lotuta.
Parte-hartzaileek oso balorazio positiboa egin zuten, eta elkarrekin egoteko eta lan egiteko gune egonkorrak izatearen garrantzia nabarmendu zuten. Dinamika mota horiei esker, erronkak identifikatzeaz gain, prestakuntza- eta txertatze-prozesuko kideen zuzeneko esperientziatik abiatuta irtenbideak eraiki daitezke.
Zentzu horretan, San Kristobal Eskola Merkatua gizarte-berrikuntzako laborategi gisa finkatu da, non prestakuntza eta gizarte- eta lan-txertaketa erakundeen, enpresen eta komunitatearen arteko lankidetzatik eraikitzen diren. Izan ere, hainbat eragile elkarrekin pentsatzera jartzen direnean, gizarte- eta lan-txertaketa ez da ardura indibiduala izaten, eraikuntza kolektiboa baizik.
ALCk koordinatuta, jardunaldiak Granadako Unibertsitatearen parte-hartzea izan zuen (Hezkuntzako Ikerketa eta Diagnostiko Metodoen Sailaren bidez), eta Lan eta Gizarte Ekonomia Ministerioaren eta Europako Gizarte Funtsa Plusen laguntzarekin garatzen da.