Sareen arkitektura eta adimen artifiziala: K-Toolen bilakaerarako aukera berriak Pedro Portelarekin
Pedro Portela ingeniari aeroespazial eta konplexutasun-adituak lan-bilerak egin ditu ALCren egoitzan eta Donostian, K-Tool plataforma digitalaren etorkizuneko aukerak eta gizarte-sareen azterketarako ikuspegi berriak aztertzeko asmoz.
Irailaren 30ean eta urriaren 1ean, Pedro Portelak lan-jardunaldiak partekatu zituen Agirre Lehendakaria Centerreko lantaldearekin, Bestiarioko kideekin eta EHUko HiTZ Zentroarekin. Sateliteen industrian ibilbide luzea izan arren, azken hamarkadan gizarte-zientzietara eta konplexutasunera bideratu du bere lana Portelak, bereziki Hego Sudango bakegintza-prozesuetan, finantzaketa-ereduak, sare-dinamikak eta ekintza kolektiborako gaitasunak aztertuz.
Sareen egitura eta K-Toolen geruza berria
ALCren egoitzan egindako saioan, sareen tipologiek komunitate baten gaitasunak nola baldintzatzen dituzten aztertu zen. Portelaren esanetan, ez dago sare-egitura bakar eta perfekturik: egokitasuna sareak une bakoitzean bete behar duen funtzioaren araberakoa da (mobilizazioa, ezagutza-trukea, koordinazioa edo elkarrekiko babesa, besteak beste).
Ondoren, K-Tool plataforman jauzi kualitatibo bat emateko aukera teknikoak aztertu ziren Bestiariorekin batera. Columbia University-ko Arthur Amalirrek K-Toolerako garatzen ari den simulazio- eta ebaluazio-lanarekin lotzeko aukera ere aztertu zen:
- Grafo-geruza bat gehitzea: Egungo datu-egitura erlazionalaren gainean nodoen arteko harremanak eta informazio-fluxuak aztertzeko grafo-geruza bat probatzea, plataforma osoa hasieratik berreraiki beharrik gabe.
- Inbertsio-simulazioak: Filantropian eta finantzaketan lagunduko duen tresna bat diseinatzea, inbertsio jakin batek ekosistema osoaren egituran izan ditzakeen balizko eraginak eta agertokiak aztertzeko.
- Lehen proba: Work4Progress Colombia hasierako proba-kasu posible gisa planteatu zen.
Elkarlana HiTZ Zentroarekin
Donostiako bileran, hizkuntzaren prozesamenduak (NLP) eta adimen artifizialak eskaintzen dituzten aukerak aztertu ziren HiTZeko ikertzaileekin. Besteak beste, HiTZek Urdaibaiko elkarrizketekin egiten ari den lana partekatu zuen, NLP eta hizkuntza-ereduen bidez entzute-prozesuaren hainbat fase aztertzeko. Horrez gain, simulazio sozialetan hizkuntza- eta kultura-aniztasuna, LLMen alborapenak eta ikuspegi probabilistiko edo estokastikoen aukerak eztabaidatu ziren.
Bisita honek bide berriak ireki ditu K-Toolen datuen arteko harremanak hobeto egituratzeko, ekosistemak modu sakonagoan aztertzeko eta sareen analisia etorkizuneko ebaluazio- eta simulazio-aukerarekin lotzeko.