Categoría Sin categorizar
Eusko Jaurlaritzaren 90. Urteurrena: Nazioarteko mintegia Columbia Unibertsitatean
Aurten Eusko Jaurlaritzaren lehen gobernua eratu zeneko 90. urteurrena ospatzen da. Gertakari hori dela eta, Agirre Lehendakaria Centerrek, bere bazkide estrategikoa den AC4-Columbia University erakundearekin eta Eusko Jaurlaritzarekin elkarlanean, mintegi akademiko bat antolatu du New Yorken, ondare hori balioan jartzeko eta haren ideiak gaur egungo eztabaidekin lotzeko: polarizazio politikoari aurre egiteko tresna digital berriak eta demokrazia sendotzeko azpiegitura berriak.
Mintegiak gaur egungo nazioarteko testuinguruan sistema demokratikoek dituzten erronka nagusiei buruzko hausnarketa partekaturako gunea eskaini zuen, bereziki polarizazioaren ondorio negatiboetan arreta jarriz. Era berean, Eusko Jaurlaritzak eta Kataluniako Generalitateak arlo honetan garatzen ari diren estrategiak aurkeztu zituzten.
Bere aldetik, mintegian AC4-Columbia Universityk eta Agirre Lehendakaria Centerrek eremu digitalean garatzen ari diren ekimenak aurkeztu zituzten, eta bi erakundeen arteko lankidetza-ildo berriak aztertu ziren, demokrazia sendotzeko eta ingurune digitaletan polarizazioa kudeatzeko.
Mintegiak demokraziaren, gatazken ebazpenaren eta berrikuntza digitalaren arteko elkargunean diharduten nazioarteko akademiko, arduradun publiko eta berritzaile nagusiak bildu zituen. Parte-hartzaileen artean izango dira Jeffrey Shaman, Columbia Climate Schooleko dekanorde nagusia; Beth Fisher-Yoshida eta Josh D. Fisher, AC4-Columbia Universityko ordezkariak; Eusko Jaurlaritzako goi-kargudunak, tartean Ander Caballero eta Asier Aranbarri; HiTZ - Hizkuntzaren Teknologiako Euskal Zentroko (Euskal Herriko Unibertsitatea -EHU) German Rigau eta ikertzaileak; eta Kataluniako Generalitateko ordezkariak, Clelia Colombo eta Gemma Galdón, besteak beste.
ALCn konpromisoa New Yorken aztertutako lankidetza-aukerei jarraipena ematea da. Zehazki, AC4–Columbia Universityrekin eta HiTZ – Hizkuntza Teknologiako Euskal Zentroarekin batera lan egingo dugu, polarizazio politikoaren mekanismoak identifikatzeko eta demokrazia kolaboratiboko eredu berrien bidez horiei erantzuteko aukera emango duten tresna digital berriak garatzeko.
Euskal zientzia, teknologia eta berrikuntza politikak: lehen kontraste saioa
Joan den ekainaren 2an, Bilboko Bizkaia Aretoan, “Euskal Zientzia, Teknologia eta Berrikuntzako (ZTB) politika publikoak autogobernuaren berrezarpenetik gaur egunera arte” azterlanaren esparruan lehen kontraste saioa ospatu genuen.
Saio honetan, euskal ZTB sareko eragile estrategikoen ordezkaritza anitza bildu zen (besteak beste: Ikerbasque, SPRI, Innobasque, Euskampus Fundazioa, Euskadiko Parke Teknologikoak), aurrez egindako 50 elkarrizketa sakonetatik abiatuta egindako lehen azterketa partekatzeko, kontrastatzeko eta kolektiboki aberasteko helburuarekin.
Gainera, Mikel Landabaso, Europako Batzordeko Ikerketa Zentro Komunaren (JRC) Sevillako egoitzako zuzendaria, izan genuen gurekin. Haren ekarpenak ikuspegi europar esanguratsua gehitu zion gogoeta kolektiboari.
Topaketak bi helburu nagusi izan zituen:
- Orain arte identifikatutako gai giltzarrien baliozkotzea.
- Hurrengo informazio bilketa eta analisi fasea elikatzeko orientazio estrategikoak jasotzea.
Saioan, ZTBren euskal sistemaren etorkizunerako funtsezkoak diren gaiak landu ziren. Besteak beste, honako alderdi hauek eztabaidatu ziren: erakundeen arteko lankidetza indartzeko beharra, unibertsitateak testuinguru teknologiko berrian duen zeregina, arlo zientifiko jakin batzuetan masa kritikorik ez izatea, edo sortzen ari diren teknologiak (adimen artifiziala eta Deep Tech, esaterako) erabakitasun handiagoz txertatzeko erronka. Halaber, ezagutza transferitzeko mekanismoak birpentsatzearen garrantzia azpimarratu zen, bai eta etorkizuneko lehentasunezko sektoreei buruzko ikuspegi partekatua garatzeko beharra ere, hala nola osasuna eta zaintza gizarte zahartu batean.
Hau izan da azterlanaren baitan egingo diren hainbat saiotatik lehena. Uztailaren 7an, genero-ikuspegia ardatz hartuko duen hurrengo saio tematikoa ospatuko da.
Eskerrik eman nahi dizkizuegu parte hartu duzuen guztioi; zuen ezagutza eta esperientzia funtsezkoak dira ariketa kolektibo honi sakontasuna eta zentzua emateko.
Lankidetza Arabako Foru Aldundiarekin eta Gasteizko Udalarekin euskara biziberritzeko
2024an, Agirre Lehendakaria Centerrek Arabako Foru Aldundiak eta Gasteizko Udalak euskara biziberritzeko egindako ekimenak aztertu ditu, AROA plan estrategiko berriaren esparruan.
Gainera, elkarrizketak eta entzute saioak egin dira profil desberdinetako gizarte-eragileekin, euskarari buruzko pertzepzioak ulertzeko eta euskara indartzeko aukerak detektatzeko.
Azterketa horri esker, euskararekiko pertzepzioetan eta jarreretan ereduak identifikatu ahal izan dira, positiboak zein negatiboak. Erabilera sustatzeko palanka gisa jardun dezaketen funtsezko faktoreak azaldu ditu, baita estrategia espezifikoak eskatzen dituzten gizarte- eta kultura-oztopoak ere. Ikerketak nabarmendu du, halaber, beharrezkoa dela narratiba inklusiboa eta Arabako gizarteko sektoreetara egokitua sustatzea, arreta berezia jarriz gazteei eta gaur egun beren hizkuntza-integraziorako proposamen nahikorik ez duten atzerriko komunitateei.